Image credit: www.google.com Image credit: www.google.com

Multicab nga gipanghatag sa matag barangay, palyado

Multicab nga gipanghatag sa matag barangay, palyado

Daghan sa mga multicab nga gipalit gikan sa Priority Development Assistance Fund (PDAF) ni Senador Chiz Escudero og gihatag sa mga barangay sa dakbayan sa Sugbo gihulagway nga mga gubaon.

Si Senador Chiz alyado sa Partido Liberal mao nga ang 80 ka multicab gipintalan og blue ingon man yellow nga maoy official color sa Bando Osmeña Pundok Kauswagan (BOPK) nga kaalyado ni Chiz.

Ang Department of the Interior and Local Government (DILG) maoy nag-asikaso sa mga multicab nga gipanghatag sa mga barangay sa dakbayan.

Pipila sa mga barangay sa dakbayan nahatagan na sa multicab nga para kanila apan ang mga opisyal nagreklamo kay gihulagway nila nga depektoso ang maong mga sakyanan.

Si Carreta Barangay Kapitan Eduardo Lauron miingon nga nakagamit ra sila og kausa sa multicab kay mo-overheat man ang makina. Nakita nila nga gitaya pag-ayo ang radiator tank sa sakyanan.

Matud ni Lauron nga ang maong multicab nga gipalit sa kantidad nga P170,000 gamiton unta sa ilang tanod sa pagpatrolya sa ilang barangay.

Si Adlaon Barangay Kapitan Elvis Narra miingon nga ang multicab nga gihatag kanila dili usab kaayo makapakarga og daghan kay mohangad.

Gihulagway ‘sab ni Kapitan Narra nga walay pwersa ang makina sa maong sakyanan. Ingon usab niini ang naobserbahan sa multicab nga gihatag didto sa Barangay Zapatera.

Matud ni Zapatera Barangay Konsehal Jose Sadaya nga mokalit lang og hunong ang sakyanan kay mapawong ang makina.

Ang laing kapitan nga si Fritz Gerald Herrera sa Barangay Lorega-San Miguel miingon nga ang multi-cab nga gihatag kaniya expire na sab ang rehestro.

Ang mga barangay kapitan miawhag sa kadagkoan sa DILG nga unta tagdon dayon nila ang maong problema.