pia receives pqa

PIA Nakadawat og Philippine Quality Award

PIA Nakadawat og Philippine Quality Award

Gipangunahan ni Presidente Benigno S. Aquino III ang seremonya sa paghatag sa 16th Philippine Quality Award (PQA) sa Philippine Information Agency (PIA) ug upat pa ka organisasyong gi-ila tungod sa dalaygong buhat sa pagtuman sa gimbuhaton niini nga gipahigayon sa Rizal Hall sa Palasyo sa Malacañang niadtong Byernis.

Dalaygong Buhat

Gitumbok sa Presidente sa iyang mensahe ang kamahinungdanon sa dalaygon nga pagpatuman sa gimbuhaton ug pagtakda og taas nga sumbanan sa pagpangalagad sa gobyerno o sa mga pribadong buhatan.

“Ang sapat na ay hindi sapat. Dahil sa pagpasok ng bago, maagham na mga tuklas sa lahat halos ng larangan ng kasanayan, iilan na lamang ang maidadahilan para sa mga trabahong hindi mahusay kaya naman—sa sektor pambayan o pribado man—ang pagpasok ng panahon ng pinakamahusay na itinaas na pamantayan sa bawa’t gawing produkto at serbisyo,” matud pa sa mensahe ni Presidente Aquino.

Hagit sa PNoy

Sa iyang pag-ila sa mga nahimo ug katakos sa matag usa nga nakadawat sa maong pasidungog, gi-apil usab sa Presidente ang hagit nga tarungon ug buhaton ang mas labaw nga dakung papel sa padayon nga pagpakita sa katakos, paglambo ug kaabunda sa mga Filipino.

Gawas sa PIA nga gipangunahan ni PIA Director-General Jose Mari Oquinena, midawat usab sa Recognition for Commitment to Quality Management ang mga mosunod:

1) Department of Science and Technology (DOST) Region XI nga gipangunahan ni Dr. Anthony Sales;

2) Lyceum of the Philippine University nga gipangunahan ni Atty. Roberto P. Laurel;

3) Philippine Association of Colleges and Universities Commission on Accreditation nga gipangunahan ni Dr. Rosita L. Navarro;

4) Zamboanga Polymedic Hospital (Ciudad Medical Zamboanga) nga gipangunahan ni Mr. Erwin G. To.

Philippine Quality Award

Ang Philippine Quality Award ang labing taas nga nasudnong pag-ila sa dalaygong organization performance.

Kini ang pang-atbang sa nasud sa gi-ilang Malcolm Baldrige National Quality Award sa Estados Unidos ug uban pang pag-ilang ginahatag sa 88 ka nasud sa kalibotan.

Gisugdan ang PQA niadtong 1997 pinaagi sa Executive Order 448 ug gisundan sa Republic Act 9013 nga gi-ila isip Philippine Quality Award niadtong Pebrero 28, 2001.

Gitakda sa PQA ang sumbanan sa paggiya sa mga organisasyon nga makahimo og world-class performance.

Ang Department of Trade and Industry (DTI) ang tigdumala sa pagpasidungog sa PQA.

Photo above: President Benigno S. Aquino III shares the stage with Philippine Information Agency (PIA) Director-General Jose Mari Oquiñena and Presidential Communications Operations Office (PCOO) Undersecretary for Operations George Syliangco for a snap shot during the 16th Philippine Quality Award (PQA) Conferment Ceremony at the Rizal Hall of the Malacañang Palace (Image Credit: www.facebook.com/presidentnoy)