Rama OK sa Pagdisiplina sa mga Badlongon nga Vendors

Adunay bendisyon ni Mayor Michael Rama ang pagpatuman og estrikto nga kampanya ni City Administrator Lucelle Mercado batok sa mga badlongong sidewalk vendors.

Si Rama mipahibalo nga ang pagpahapsay sa tibuok dakbayan sa Sugbo gikinahanglan kaayo isip pagpangandam sa nagsingabot nga summit sa mga lider sa Asia-Pacific Economic Cooperation (APEC) nga gikatakda nga ipahigayon karong sunod tuig.

Ang mga sidewalk vendors nga gipahunong ni Mercado sa pagpaninda bali’g tulo ka adlaw isip silot sa ilang kabadlongon, nakasabot sa gihimo nga pagdisiplina kanila.

Ang mga tindera nga gipahunong pagpaninda bali’g tulo ka adlaw mao ang mga namaligya og imahen sa mga santos likud nga bahin sa Basilica del Santo Niño ug ang mga sidewalk vendors sa dalan B. Rodriguez.

Matud ni Rama nga gihatagan niya og bendisyon si Mercado nga moabag sa pagpahapsay sa dakbayan sa mga gubot nga talan-awon, ilabi na ang gimugna sa mga badlongon nga vendors.